قصيده الاسم المشطوب لعبد الرحمن الابنودى <الى عبد العاطى >

قصيده الاسم المشطوب لعبد الرحمن الابنودى

ارحب بكم اخوتى وقصيده

مهداه للبطل محمد عبد العاطي صائد الدبابات في حرب أكتوبر ...

وقد نشرت في جريدة ( الدستور) المصرية بتاريخ الأربعاء 14 من جمادى الآخرة 1429 هجري الموافق 18 من يونيو 2008 .

يقول الخال عبد الرحمن الابنودى فى حوار صحفى معه تعليقا على قصيدة الاسم المشطوب

أحزنني جدا أن عبد العاطي صائد الدبابات مات بفيروس c ولا يعرف أحد عنه شيئاً ، بل لم يجد ثمن الدواء ولم ينقذه أحد !! ولم يسأل عنه أحد .
ويتوقف الشاعر الكبير ليلتقط انفاسه قليلا ثم يقول : عبد العاطي أجمل رموز حرب أكتوبر الذي أسر قائد الدبابات الإسرائيلي " عساف يا جوري " هل تصدق انه هبط علي وانا في غرفتي في باريس ؟... هبط علي زي الكابوس ، احاول الهرب منه بلا فائده لم أستطع .. وكتبت قصيدة .. " عبد العاطي " ، مش ممكن الافتراء بتاعنا ده ايه ده ؟! نفس الحكاية ... الناس التي تموت في طوابير الخبز .. لا .. لا .. الشعب المصري نبيل جداً ويجب أن يعامل بنبل ، ما العالم كان رأس مالي ، لكننا لم نري رأس ماليه تلتهم رقاب الناس كدة .
ربنا مايوريك غضب الشعب المصري .. لانه الآن في مرحلة غضب وربنا يحمي مصر من غضبه ، لانه يشعر انه لم يعد يملك فيها شيئاً ، ولو أحرقها لن يخسر شيئاً لو أحرق العربيات والبيوت والعمارات التي بناها علي أكتافه ،أصل الرأس ماليه فاكره إن مارينا بعيدة عنه ؟إزاي دا هوه الذي بناها ويعرفها بدقه ، ماينفعش تستولي علي مقدراته وتبيع كل ما يمكله وتلهفه وتتركه هكذا ....!

*****************
الاسم المشطوب

اكشف غطا وجهك ومزع القناع
بلا حكومة .. بلا لكومة
بلا بطولة بلا بتاع

ياأسمر يأبو القلب الحديد
ياللي واجهت الموت ... في كل اتساع
يااسمر يابو الوجه العنيد
يا مصري ... ولحد النخاع
كله طلع كلام يا خال !!
والحال ..رجع تاني حال
أتاري الحرام..... هوه الحلال
وأتاري الهدى هوه الضلال
شموا نفسهم من جديد .
والمرة دي ..
بدمك أنت يا بطل .... مع الأسف
وبعجنة اللحم اللي تتسمى الشهيد
ويعملوها عيد بليد
تعرفش بيه غير م الصحف .
واعترف ....
العيد بييجي ...
لاجل ما تموت من جديد
ولو ان موتك ريح بتغلب الرياح
لكنه ما حركش ليه أسن الحياه؟
ويا صاحبي ....
ما حركش ليه ألم الجراح؟
راح اللي راح
فلا انتظار ولا أمل
الحرب خلصت يابطل
والفرحة هبت في الوطن ياصاحبي
من كل اتجاه
وزي ما قالوا: طلع نور الصباح
ورفرف العلم العظيم العالي
على كل الجباه
لكنه...
ليه من غير حياه؟
والنصر ليه على رقاب كل اللي عملوه
اتكى ؟
وليه في أرض المعركه
نسينا كل اللي بلغناه
بالمعاناه
والعرق وبالفخار ..وبالبكا
يا صاحبي ع الحلم اللي ضاع
ونصرك اللي راح وما عادلوش شهود
وما عادش داخل الحدود
غير اللي سمسر
واللي قرقر

واللي وفر ... واللي باع

****

اللي هوى الوطن .....هوى

بالعشق ولع وانكوى

من قبل ما يفتح ..... ذوى

يا أحلا أبناء الوطن
ترحل عليل......... بلا دوا
ترحل وحيد مجهول ...حزين
نرحل سوا

****

نرحل سوا. أنا وانت والوطن الحبيب

ونسيبها للوطن الغريب

نسيبها للوطن المريب

لديب .. بيحرس الجياع
والوهم اذا كشكش ..
بيزداد اتساع
وانت العريس اللي بنيت المجد
بايديك الجمال
وبقيت دريس طار في الخيال
وكئن حربك النبيله
لعبه لعبوها العيال
لعبوها ع الساكت
اتمرمغت الصفحة اللي فيها اسمك
حدوته...!
وسط الحواديت تاهت
الاسم مشطوب
والتاريخ ....باهت
ما فضلشي منه شيء يا عبد العاطي
لم العدو دباباته بعيد عن سينا
نسونا.............. فنسينا
والاسم
كان لازم في سكة الخيانه
يتردم
واللي كتب عنك ندم
واللي وقف جنبك ندم
اضطر يفضح لعبة التبديد
وحاصروه بالوصم والتهديد
صبح الشريف موصوم
هوه الشريف اللي تمللي يتوصم
وبقى السليم مجزوم
يستعملوا وياه ياخال
لغة الجزم
وبقى الجبان صنديد
فارحل حزين مظلوم
ارحل سفيه موصوم
ارحل مريض ساكت
ارحل الى أبعد بعيد

*********

مصر المهيبه بتنحدر للواطي

هل كنت تتخيل في يوم

السرعة دي في الموت يا عبد العاطي

حتى وانت قصاد صفوف الدبابات ؟
سامحني أنا ماعرفش كام عندك
من الأولاد وم البنات ..
هل كنت تتخيل خيانة الوطن؟!
هل كنت تتخيل عبير هذا الزمن؟!
وهو صاعد للعلا نتن..؟!
وقول بحق

ان كان قلبك خاف

والأر بي جي

مسنود على الأكتاف

ساعة اغتيال عساف؟
وهل خطر ع البال يا عبد العاطي
ان الخيانه حتسكن الآتي؟
وان ملعوب لاتفاق ملعوب ؟
وان اكتوبر حيتباع ويا مصر؟
ــ الاتنين ــ في سوق العصر..؟
والمؤمنين
حينطردوا من صيغة المستقبل
ويصعد الخاطي ؟!!
دلوقت ايه اللي مضيق
صدرك الوسيع؟
وبتفهم ازاي الفروق
بين اشترا الوطن الأسير
والبيع؟
النصر تمنه اشتروا بيه قصر
تمن الوطن
اذن لدخول السمسره
ماكانتش حرب
ماكانش نصر
واللي رفضناه لاجل نتقدم
حدفنا بعيد ورا

*******

ما تقولش زيي كان وكان

كان حيلة لاجل يموت فقيرها

في طوابير الهوان

وطنك يا صاحبي كان زمان
واللي احنا فيه
زمن العفاريت السمان

*****
اصمد يا صاحبي لموتك العبثي
باعوا الوطن ياصاحبي بالمجان
مجان لكن ما تقدروش أتمان
ما راح زمان الشاذلي.. والجمسي

وشمس سينا يوم ماعششت

صدرك العريان

غابت فانسى الحرب يا غلبان

أعداء وطننا صاروا أحبابه
ـــ مستمتعين بالوطن والوقت خان الوقت ــ
بيسلكوا وكأنهم أصحابه
أنت العدو دلوقت
أنت نشاز اللحن
أما احنا يا بطلي الحزين
فمدينا لهم للحياه
شريان ورا شريان
زعيقي وسط الخلق زي سكاتي
وتفاؤلي بقى جزء من احباطي
اتغيرت كل العقول
واتبدلت كل الفصول
واتعفرت كل الشموس
واتغبرت كل النفوس
وزي ما تقول قول!!
اسمك بهت
وكأن عمره ماكان
اتباع كأنه بضاعه ف الدكان
في الانفتاح على عورة الأوطان
آدي الجناة أبرار ...
وانت الخاطي .
وانت غلطة الوطن
في صفقة الشيطان
يا عبد العاطي
أنت نويت
وأتاري فيه غيرك نوى
ناس عليو فوق
وسابوك بتبحث في الفتات
عن الدوا
لكبدك اللي ما احتملش فانشوى
يا صاحبي موت أرجوك
وموت الغضب
الاسم كان هوه الهدف
رفرف على مرمى النيران
وكأنه قاصد ينضرب
الاسم ضلم وانشطب
ومصر مصرين
مصر هما واحنا
ليهم الغنايم والبهايم احنا
صوتهم وجع مسموم
بيسكن العصب
ويلهب اللهب
ياصاحبي موت أرجوك وموت الغضب
لعينيك ياصاحبي بانتمي
كان صدرك هوه صدر بلادي
من الهجير باجري عليه
واترمي
وأنا قصدي أغسل همي.. بازداد هم
عفوك ياعبد العاطي
الوطن عمي ..
وامشي وهملنا يابن العم
واسمك المشطوب
مازال هناك مكتوب
في قلب سينا في سرها الدفين
في صدور جميع المخلصين
المرضى زيك ياوطن
واللي حيغلبوا المحن
واللي حيجلو عنه عار الغبار
عشان يشع اسمك كأنه نهار
الاسم ـــ رمز العزة ـــ
بيصيبهم بداء
ينسوك ما ينسوك . الضمير متذكرك
هنا مش هنا ــ صدقني ــ
بكره حافكرك
مين اللي قال يامصر ابنك ضاع؟
دحنا حنعلن ع المشاع
اسم اللي باع حلمك ياعبدالعاطي
للشرق أو للغرب
للأهل أو للغرب ..
ولحد ذاك اليوم
سيب الحياه تمشي لورا بالورب
مين ده ياعبد العاطي
أبو جته جامده وكرش؟
اللي بيحدف بالمتين مليار
ويعز ع الناس قرش؟!!
هل شفته يوم الضرب؟
هل كان معاك في الحرب؟
أتاري دم الشهدا له أتمان
تمن الشهيد مابيقبضوش والدنهب
وصيع بينهبو المقاطيع
ويالله بيع كل اللي شلناه للزمان
ويكون شعار بلدك
بدال ماتبني بيع.
هنا تكتشف ان الخراب
هوه الربيع
بيع المصانع والصحاري واشتري
آخر حدود الأرض والشواطيء
وهكذا
مصر اللي كانت ملكنا
واللي حميناها بصدرك عننا
انسحبت واحنا في عز النوم
انسحبت في السر وف كام يوم
هربت كده علنا يا عبدالعاطي

****

مش دي البلاد اللي حاربت عشانها

ولا هم دول ياصاحبي حكامها

ولا مصر دي اللي رفعت أعلامها

ورميت بروحك في خضم الحرب
ونيرانها.
فين احنا دلوقت ياعبد العاطي
مين اللي وطى العالي ياصاحبي ؟!!
وعلى الواطي
مين اشترى بتمنك الصحرا والشاطي
وطاطي
فاكرنا وراه حنطاطي
وصالح القاتل وعادانا
وادانا ضهره وسابنا ببلاهه
نعد قتلانا
وهرب بمصر وخبى عنوانها؟

!!

****

ارحل ياعبد العاطي

يابن الطيبين ارحل

ارحل وحيدمظلوم حزين أسهل

كل القصص ماتت
كل المثل ماعت
كل الحقوق ضاعت
البياعين باعت
أهل القيم صاعت
وأهل الحقوق جاعت
حتى اللي صابت
من جديد خابت
كله اتمسح والزور
هوه اللي شادد خطوته
وثابت
والنصر كان ياعم عبد العاطي
أهم أغلاطك وأغلاطي
ارحل بتتفرج على عشوش اللصوص
المحروسين ببدله ظباطي

!!!

*****

ياللي كسرت القانون

وحاولت وطنك يكون

مات الوطن

ورجعت الميه تاني تمشي في الواطي
يابطل زمانه فات
ياصياد الدبابات
يامجسد الحسرة
فى أسوأ معانيها
ماعدش غير الموت حرية
ارحل ياعبد العاطي
لا أكل ولا ميه
لاحلم بالألوفات ولا الميه
الحسرة وطنية
الحسرة وطنية
دواها لا من صبر ولا من نوم
انت الشهيد اللي ضل وعاش
لحد اليوم
ماعدش شيء ينباع
يا مزعج اللي تاجروا في النسيان
في وطن بيشم بالصمت
وما عادش لازمه سماع

****

عارفك ما متش علة

مت تعب

ماهو كام سنة يا صحابي

يحتمل الحطب... نار الغضب؟
وكل ما تبرق صور في الذاكرة
للدبابات اللي حرقت

أو الجنود اللي قتلت

ولما م الضحك اتمزعت

بفرحة النصر اللي كان ابداع

كل اللي ضاع منك
مع اللي ضاع
تخمدها بكفوفك بصمت رهيب
من غير ما تعتب ع الوطن
وتودي وياه في الألم
وتجيب
كلمنا وانت في السرير عيان
عن اللي ولى ...وخان
وعن اللي باع النصر ف الدكان
مش ده الوطن
اللي اتفقت معاه ياصاحبي زمان
تئن والأنين مرير
وانت بتقلب على السرير
سرير فقير
تطلق زفير الحزن في النفس الأخير
ولا الشاشات بكيت
ولا المذياع أذاع
فاكشف غطا وجهك
ومزع القناع
بلا حكومة
بلا رئاسة
بلا معارضة
بلا بتاع

********************

عبد الرحمن الابنودى ...
باريس فى 16 ابريل 2008

اخى حسن عجبى
مره اخرى احييك

واهنيك
على الخاطره الجميله

[ندعوك للتسجيل في المنتدى أو التعريف بنفسك لمعاينة هذه الصورة]

مش دي البلاد اللي حاربت عشانها

ولا هم دول ياصاحبي حكامها

ولا مصر دي اللي رفعت أعلامها

ورميت بروحك في خضم الحرب
ونيرانها.
فين احنا دلوقت ياعبد العاطي
مين اللي وطى العالي ياصاحبي ؟!!
وعلى الواطي
مين اشترى بتمنك الصحرا والشاطي
وطاطي
فاكرنا وراه حنطاطي
وصالح القاتل وعادانا
وادانا ضهره وسابنا ببلاهه
نعد قتلانا
وهرب بمصر وخبى عنوانها؟

!!
شكرا لك استاذي لانك سمحت لنا ان نقرا لشاعر سخر قلمه من اجل وطنه وابناء وطنه ومن اجل اعلاء كلمة الحق
فعلا انا لم اقرا خاطرة بقدر ما قرات واقع والم واقع وكلمات نابعة من واقع اليم
بارك الله فيك
وانا كمان حناديه بخالي عبد الرحمن الابنودي
سعداء نحن بوجودك معنا لاننا معك سنتعرف عن خواطر خالك وخالي
الذي فعلا ارتحت لكمات خواطره
[ندعوك للتسجيل في المنتدى أو التعريف بنفسك لمعاينة هذه الصورة]

[ندعوك للتسجيل في المنتدى أو التعريف بنفسك لمعاينة هذه الصورة]

ارحل ياعبد العاطي

يابن الطيبين ارحل

ارحل وحيدمظلوم حزين أسهل

كل القصص ماتت
كل المثل ماعت
كل الحقوق ضاعت
البياعين باعت
أهل القيم صاعت
وأهل الحقوق جاعت
حتى اللي صابت
من جديد خابت
كله اتمسح والزور
هوه اللي شادد خطوته
وثابت
والنصر كان ياعم عبد العاطي
أهم أغلاطك وأغلاطي
ارحل بتتفرج على عشوش اللصوص
المحروسين ببدله ظباطي

استاذحسن بشكرك جزيل الشكر على هذة القصيدة الذى تخكى لنا بعض من مقتطفات 6اكنوبر

وفعلا ان شاعرنا الابنودى شاعر حكايه من الانواع التى تاتى مرة واحدة
مثل عبد الحليم وام كلثوم
ونسميهم بزمن الفن الجميل الى لا يعوض

[ندعوك للتسجيل في المنتدى أو التعريف بنفسك لمعاينة هذه الصورة]تكرم اخى على هذة القصيدة

وتسلم الايادى

[ندعوك للتسجيل في المنتدى أو التعريف بنفسك لمعاينة هذه الصورة]

اكشف غطا وجهك ومزع القناع
بلا حكومة .. بلا لكومة
بلا بطولة بلا بتاع

ياأسمر يأبو القلب الحديد
ياللي واجهت الموت ... في كل اتساع
يااسمر يابو الوجه العنيد
يا مصري ... ولحد النخاع
كله طلع كلام يا خال !!
والحال ..رجع تاني حال
أتاري الحرام..... هوه الحلال
وأتاري الهدى هوه الضلال
شموا نفسهم من جديد .
والمرة دي ..
بدمك أنت يا بطل .... مع الأسف
[ندعوك للتسجيل في المنتدى أو التعريف بنفسك لمعاينة هذه الصورة]

» أحزاني العادية ل عبد الرحمن الابنودى
» قصيده المتهم ل الشاعر الابنودى
» تابع رسايل الاسطى حراجى القط للخال عبد الرحمن الابنودى
» رائعة عبد الرحمن الابنودى (يامنه)
» عبد الرحمن الابنودى القدس قدسي