بلدنا الخضره إنسانه محبوبه

بسمة بلدنا الخضره إنسانه محبوبه

وإبن البلد عتره من طابا للنوبه

قبل العماير كان هرم ومصر كات طيبه

بلدنا نبع من الكرم والحب والطيبه

والنيل بيجرى فى أرضها والدلتا دى توبه

نبض القلوب من حبها دى بلدنا أعجوبه

شمس المحبه بنوته شابه بتطل حبه وتستخبى

فارده جدايل شعرها وعيون مها

حتى الغريب بيحبها فارس ويحلم قربها

على أرضها أزهر علام لأصغر غلام

حمام سلام فارد جناحه فى السما

جندى همام شايل سلاحه حامى الحما

فلاح بيزرع عامل فى مصنع

وطبيب يداوى آلام بتوجع

وسفن بترسى على الشطوط

ومعلمين ومهندسين يبنوا العقول يبنوا البيوت

والكل داب فى حبها على أرضها

يحكى التاريخ ويقول عنك ياأم الرجال

دا الجندى مش معقول روحه فى وقت النزال

معنى الفدا والتضحيه ومضرب الأمثال

ورضاك عنا أمنيه يامربيه الأجيال

ياأم سينا وطابا ياصخرة للعدوان

عاشق مغرم صبابا بأعزف ليكى الألحان

ياأم الليل والجمال والورد على الأغصان

عند الشعر الخيال والمعنى والأوزان

يابلدنا يحميكى ربى طول الزمان

وبروحى هأفديكى ياوهبانى الأمان

فنان بريشه رسمك يامصر

معنى الحضاره فى كل عصر

غضبة بلادى قويه على كل إيد تتمد

وإيدنا واحده عفيه وتحدى مالهوش حدد

وقت السلام إحنا وئام

وقت الحروب إسأل شعوب

عن جندى مصرى رايح يدافع عن أرضه

هتلاقى رده روحه ودمه

فدا لأرضه الغاليه عنده

بسمة بلدنا راحه لتعبنا قوه لشبابنا

هنعيش فدا بسمة بلدنا

حبيبي انت يا برنس من ايام ما كنا بناكل حرنكش ودوم

خد دي

مصر الطحين و الفلاحين و البنايين و السقايين

و الصيادين و المنشدين

و الصنايعيه

مصر النخيل و النيل و الصبر في المواويل و الملاغيه

مصر السمار و العمار

و ابن إياس و الجبرتي

و عجايب الآثار

و حواديت الشاطر حسن و امنا الغوله

و سكه السلامه

و سكه الندامه

و سكه اللى يروح ما يرجعشي

و تعالى يا شاطر نروح القناطر

و البيض الملون و شم النسيم

و مصر النديم

و هوجه عرابي و حرب الطوابي

في وجه الخديو عميل لنجليز

و مصر الملانه و حب العزيز

مصر الكنايس و مصر الجوامع

مصر المزارع و مصر المصانع

و خان الخليلي

و درب الغوازي و سيدنا الحسين

و فرعون و موسى و بركه قارون

مصر العديد و السكه الحديد

و مصطفى كامل و محمد فريد

مصر الموالد و شيلاه يا طاهره

يا ست ام هاشم

يا جبر الخواطر

يا ماري يا جرجس

يا سيدي ابراهيم

تناولوا اللي عايز

و تشفوا السقيم

مدد ثم نظره

في قلب المقام

و نخرج قوام

و نلعب يا حاوي

الطبيب المداوي

و ابو رجل مسلوخه

و الست اللى كلت دراع جوزها

في جنينه الحيوانات

الكلب ابو سنان دهب

و سبحان من وهب

مصر الكتاتب و المدارس

و التلامذه و الثوره و الأناشيد

السجن و السجان

و العشاق المعاميد

مصر "الولاد السمر خضر العمر في عموم الحواري" "مصر البنات المخطوبين في المهد لسرير الجواري"مصر الصيام

و السحور

مصر السواحل و البحور

مصر المظالم و البلاوي

و الباش اغا التركي

و ادهم الشرقاوي

مصر الحديثة و رفاعه رافع الطهطاوي

مصر العلوم و الفراعنه

و الطب و التنجيم

مصر محمد علي الفاتح

و ابنه ابراهيم العظيم

مصر الجناينيه و الشيالين

و بياعين العرقسوس و اللمون البنزهير

و خير اللهم اجعله خير

مصر الحضر و الريف

و ازهر العلم الشريف

و سليمان الحلبي

و جمال الدين الأفغاني

و الأمام محمد عبده نعم الأمام

عليه البراوه و عليه السلام

مصر الصعايده و الرشايه و البحاروه

و السواحليه

مصر النهود الشهود

و الرموش السود

و القدود المعجبانيه

مصر الغيطان

و جمال حدان

و طه حسين و لويس عوض و العقاد

و فؤاد حداد

و نجيب محفوظ

و صلاح جاهين

و البيانولا

و عم بيرم و البراقع و اللبده و الجلابيه

مصر النجوع و الكفور و البلاد

و طلعت باشا حرب زعيم لا قتصاد

مصر الفنون اللي جاءت

و فاقت جميع الظنون

مراسح و سما و نغم و روايات

الشيخ سيد درويش البحر

و بديع الزمان ابن خيري

و عبده الحامولي و يلامه حجازي

و نجيب الريحاني

و عبد الوهاب حبيب الحكومه و الست ثومه

اميره بلاد العرب في الطرب و الآهات

و مصر اللي كانت و مصر اللي جات

مصر المداين و الزقاق

مصر المشلتت و الرقاق

و مختار زمانه و نهضه بهيه

اللي هي الحكايه و هي القضيه

ما تقدرش ترصد جميع المعالم

ما تقدرش تفهم جميع اللغات

خلاصه الكلام انا مستهام و مغرم صبابه و ميت غرام و سهران تملي و مش عايز انام

و كل انشغالي في جوف الليالي

بادور عليه في عالم زحام



منور يا برنس الليالي

هههههههههههه
حلوة منك يا ابن البلد موضوع الحرنكش و الدوم دة
بس يا ريت تبعتلى منه شوية و النبي
تسلم يا برنس على اختيارك دة

يا برنس

عندك كبايه دوم ومزتها حرنكش

لساره هانم ولا انت نايم

اصحي ووحد الدايم

وشد علي راسك اغلي العمايم

ابعت لك مركب ولا تيجي عايم


هههههههههههههههههها

منورين والله