&* مـش نـبــــي *&

مش نبــي

كنت فاكره انك نبى
بس خلاص
مات الهوى
و أنا جايه اعزّي حضرتك
مبروك عليك
صحيح : شاعر
بس مش شاعر بناري و لهفتي
فكّرت فيّا
و الدموع نازلة تسابق حسرتي ؟
و أنا ياللي من بين الخلايق كلها
قلبي اصطفاك
خلاك نبي
اكمني عارفة إن الهوى
لما بيبعت أنبيا
يبقى النبي مبعوت لواحد
م البشر
و نبوتك ليّ أنا
لما دعيتني جريت عليك
و أمنت بالعشق اللي سطّر طلعتك
على نن عيني
و قالى لروحي
: قربي
قربت لك
و قرينا ف كتاب الوفا
عهد الغرام
و عشر سنين
و أنا جوا محرابك
باطوف
لابسة هدوم الرهبنة
ما تعبت يوم
ولا ثانية صاحبني الملل
و لا خفت بإيديك ينجرح
قلبي الصبي
اعذرني لو قلبي اللي آمن
شك فيك
و شطاني وسواسه ابتدى
ينصحني اكفر
بآيات الغرام
ما أنا شايفة غيري قرّبت
تسمع ترانيمك بشوق
و بدال ما تسكت
لجل تمشي
جلجلت ألحان هواك
كسّرت فيّ كل إحساس
بالأمان
بالإيمان
باللي كان
و نديت عليها و سيبتني
وسط الطوفان
اللي ف ثواني
جه يغرّق مركبي
اعذرني
ما أنا قلبي الغبي
صدّق بإن مسيلمة
ممكن يصون عهد الوفا
لو قلبه داق طعم الهوى
ويكون نبي
صدقني و حياة الليالي اللي قضيتها
ف جنّتك
أنا عقلي من أول دقيقة
دخلت فيها دنيتك
قال لي ابعدي
كدّبت عقلي
و عشت ف الوهم الجميل
و أما انتبهت عرفت إنك
مش نبي