* واحد ومراته ركبوا الأسنسير ..اول دور قالها بحبك ..وفي الدور الأخير طلقهااا......؟

محمدين متجوز بقاله 4شهور وبيحب عروسته جدااا وهي كمان بتموت عليه...وكان اسمها سعديه.... وبتغير عليه اوى من جارتهم نبويه اصلها بت حلوه بس بتقول عليها مفتريه

وفي يوم سعديه قاعده مع صاحبتها نبويه

سعديه من غير نفس : إزيك ياللي تِنشكي
نبويه مش عاجبها الكلام : أهلا يا محروسه ياختي
سعديه : محروسه!
نبويه : بلاش ... اهلا يا منحوسه
سعديه :ماتلمي لسانك يابت
نبويه : إسكتي يا سعديه دانا امبارح كنت هاموت
قعدت معايا حماتي وصاحبتها ويحكوا عن الميتين والمقابر وعذاب القبر وانا جتتي إتلبشت
سعديه تضحك: انا عارفا عزرائل ناسيكي وراح فين
نبويه : ضربه فى قلبك ... يابت انا بتكلم بجد
انا نمت من هنا والكوابيس مسكتني .. واحلم بالعفاريت .. وانا نايمه بتقلب لاقيت حاجه طريه تحت رجلى .. وانا نايمه فى السرير لوحدي ..إتفزعت قمت بسرعه لاقيت واحده منكوشه فوشي فضلت اصرخ واصرخ ... فكرت روحي مُت ودخلت جهنم

سعديه تضحك: يوه .. ماطلعتش جهنم ... أمال طلعت إيه؟
نبويه : طلعت أخت جوزي الله يخرب بيته نايمه تحت رجلي
سعديه : يوه .. مالقتش الا تحت رجلك وتنام .. مش رمتك على الارض ليه ونامت هيه...
نبويه تضربها : رميه اما تاخدك .. انا ترميني على الارض ياللى مش بتفهمي..

سعديه : بصراحه ياأنبوبه ياختي انا مش بحبك لله في لله من غير اى حاجه

نبويه : انبوبه اما تفرقع فيكي يا بعيده ...انشالله ماحبتيني .. دانتى وشكك يقطع الخميره من البيت

سعديه : انتى زعلتي يا نبويه .. انا بضحك معاكي
اصلى بصراحه بغير على محمدين منك

نبويه بتهكم: بتغيرى على مين ؟ ياشيخه دانا أحطلك عليه فلوس ... دا حد يبصله... بلا قرف

سعديه : ضربه في لسانك ... دا سيد الرجاله .. احنا النهاردا نازلين على مصر .. هنروح نزور أخته وكمان يودينا السيما ...

نبويه بحقد : ربنا يهني تعيس بتعيسه (قامت نبويه وهى النار بتاكلها وراحت على بيتها لقت حسنين جوزها قاعد قدام التليفزيون)
نبويه : هو انت مش وراك غيره
حسنين : كنت لاقيت وقولت لا
نبويه : لاقيت إيه إنت مش بتشوف يا راجل انت
حسنين : مش شايفه النضاره اللى لابسها
نبويه تقرب منه : طب حتى شم يمكن تفهم
حسنين : منين الريحه دي
نبويه بفرحه : عجبتك
حسنين : عامله زي ريحة الميتين
نبويه بضيق : اهو إنت يا بعيد .. منك لله البت رايحه مصر وانا هنا فى الهم للرُكب ..
حسنين : الا قوليلي إنتي شفتي سعديه النهاردا
نبويه بمكر : واشمعنى سعديه
حسنين: انا بسالك مش عايزه تردى انشاله مارديتي
نبويه دخلت اوضتها وهيه قرفانه وتمتم : انشالله قبر يلمك ويريحني منك


اما سعديه لبست واتهندمت ومشيت مع محمدين وهي فرحانه وايدها بإيده ومبسوطه وركبوا القطر وطول الطريق يحب فيها ... لحد ماوصلوا العماره اللى اخته ساكنه فيها

سعديه :الله يا محمدين دي كبيره وحلوه قوي
محمدين : قولى اللهم صلى على النبي
سعديه: اللهم ما صلي على النبي...(محمدين وقف قدام الاسنسير )
سعديه باستغراب : أيه ديه .. هي اختك ساكنه فى العلبه دي
محمدين يضحك : دا اسنسير بيطلع فوق بدل السلم
سعديه يالهوي يالهوي .... أخاف منه يا محمدين

محمدين :لا مش تخافي
سعديه بدلع : أنكسف من الناس
محمدين : بطلي دلع ياوليه(ودخلوا الأسنسير وبدا يطلع بيهم وهى مستغربه اوى وخايفه وهو واخدها فحضنه يطمنها عشان مش تخاف

سعديه ترتعش : محمدين ... افرض البتاع ده باظ هنعمل ايه

محمدين يبوظ ايه بس ياشيخه (وفجأه الاسنسير وقف واتلخبط محمدين وسعديه تسأله : في ايه

محمدين : نَبرتي فيها يا وش الفقر .. اهو وقف
سعديه تلطم : يالهوى يعنى ايه هنموت هنا
محمدين: استني بس (بيحاول يشغله ويضغط على الزراير وسعديه قعدت تعيط وقعدت فى الارض )
محمدين : بطلي بأه
سعديه : انا هعترفلك بحاجه عشان لو مُت ابقى خلاصنه من ذنبك (نزل جنبها محمدين وباهتمام .. في إيه

سعديه ببكى : أنا حامل
محمدين بفرحه : صحيح حامل
سعديه : انت فرحان كدا ليه ؟.... ماهى المصيبه انى مش عارفا إذا كان منك ولاّ من حسنين (في اللحظه دي اشتغل الاسنسير اللعين ووصل للدور الأخير مع صوت القلم اللي نزل على وشها من محمدين وقالها إنتي طاااااااااااااااااااااااااااالق

ههههههههههههه
تخااااااااااااااااااااااااااااريف قبل النوم
تقبلوا تحياااااتى

بصوا بأه يا تقروه يا تنقلوه يا تحزفوه ...عادي يعني

اموتك يا حنان هههههههههههههههههههههههههه

ههههههههههههههههههههههههههههه