خليك بطاطس

عارفين ليه البطاطس المحمرة هي الاكلة الوحيدة اللي اجتمع الناس كلهم على حبها ؟؟؟
1- البطاطس المحمرة لما بتتقلي في الزيت بتبقي عادة مقرمشة من برة و طرية ولذيذة من جوة
علشان كدة لما حد يعمل معاك موقف سخن اوي !!! متعاملهوش وحش اوي
ايوة حسسه انك زعلان منه و خد موقف .. بس خلي قلبك ابيض وطري "طيب يعني" مش ناشف .. و سامح علشان ربنا بيسامح
2- البطاطس المحمرة تلاقيها عند ماكدونالدز ( فرينش فرايتس) و برضه تلاقيها عند بتاع الفول والطعمية
يعني انت كمان خليك زي البطاطساية ماتتكبرش على حد .. وصاحب كل الناس غني او فقير
3- البطاطس المحمرة بتتقدم مع حاجات كتير : مايونيز , كاتشب ,صالصات مختلفة و ساعات كمان طحينة بس بتفضل في الاخر اسمها بطااااطس ..
يعني مهما اتعرضت لثقافات و بيئات مختلفة احتفظ دايما بشخصيتك المستقلة و طريقة تربيتك و خلي الناس هي اللي تتأثر بيك
4- البطاطس برضه ممكن تبقي شيبسي .. وهي اول حاجة بنفكر فيها لما بنحس بالجوع و احنا برة البيت
ساعد الناس دايما و خليك اول واحد ييجي علي بالهم لما يقعوا في مشكلة .. يعني خليك جدع زي الشيبسي
5- البطاطس المحمرة لو اتهرست بتبقي برضه طعمها حلو .. وممكن نسميها "بطاطس بيوريه" ..
مهما الدنيا تهرس و تبهدل فيك خليك شخص كويس ولذيذ ..
وطلع للدنيا لسانك وقول: "انا بطاطساية بيوريه" ..
يبقى من الآخر علشان تبقى محبوب من كل الناس خليك بطاطس